في موضوع أنا من زمان حابب اطرحو وكنت عم استنى الوقت المناسب ويمكن هلأ حمي الحديد وصار وقت اطرحو واضربو بهالمدونة ، وهي قصة الخطبة والجواز وما بعدها وحتى موضوع الطلاق النفسي وهيك قصص ، يلي شجعني على هالشي هو متابعتي لمدونة مصرية لبنت اسمها غادة عبد العال صاحبة مدونة “عايزة اتجوز” هي مدونة بالفعل أكثر من رائعة وصاحبتها خفيفة الظل للغاية وطريقة الكتابة والأسلوب بتخلي الواحد يفرط ضحك و بنفس الوقت يتأسى ويتحسر أو على الأقل يتعاطف ، موضوع هي المدونة هو عن بنت جرئية عبرت بصدق ووضوح وأدب عن مشاعرها وأحاسيسها في ظل مجتمع عندو من العادات البالية ما يفطسه وزيادة ، وبالأساس هي البنت عم تعبر على حسب قولها عن أكثر من 15 مليون بنت عايشين بنفس ظروفها “اللي بيضغط عليهم المجتمع كل يوم عشان يتجوزوا مع أنه مش بإديهم إنهم لسه قاعدين”

يمكن هدا الوضع منتشر كثير بمصر نتيجة الانفجار السكاني الهائل بس ما بيعني أنو غير منتشر بالعالم العربي أو حتى عنا بسورية ، الموضوع برأيي مهم كثير لنحكي فيه .. ما بعرف بشو بدي بلش … بإزدواجية المعايير عند الأهل بين الشب والبنت ، وبأحقية الشب إنو يروح يعبر عن مشاعرو “المكبوتة” وبالمقابل يا غيرة الدين إذا شي بنت فكرت تفصح عن أصغر حقوقها الطبيعية والإنسانية … الشب معلش يكون بيعرف كل البنات بحارتو وكونو النبي وصانا بسابع جار فحتى البنات الساكنين بسابع حارة أو بسابع بناية برضو بيعرفهن ، أما البنت فبتاكلها العيون وبينهشوا الناس لحمها على الناشف إذا شافوها عم تحكي مع شب .. الإزدواجية من هدا الموديل ما في أكثر منها بمجتمعاتنا المتحجرة ، ما بعرف هل هي العادات والتقاليد المعفنة ولا هالدين يلي كل زلمة بفسروا كيف ما بدو وكيف ما بيتناسب مع مصالحوها.. والله ما بعرف ..

والموضوع الثاني هو قصة الخطبة وتوابعها والجوازات العظيمة يلي عم نشوفها ، رأيي الشخصي أنو هالبنت المصرية حقها تنادي أنو بدها تتجوز ، وهون عم أتسائل (يعني عم اسأل) مين يلي عطا الشب الحق بإنو يروح هو يخطب ويدور وبالمقابل البنت كل دورها أنو تقعد وتستناه لحضرت جنابو ما يشرف .. يعني مين هدا يلي عندو هالمخ العبقري وأنتج هيك فكرة جهنمية وأشاعها بين هالعالم .. يقوم يشرف ويشوف هالمصايب يلي صفيانين فيها من وراء هيك “عبقرية فكرية” ، وأول هالمصايب أنو هيك صار في إحساس عند الشب إنو هو صاحب القرار بالجواز وكأنو البنت ما لها علاقة بالقصة ، وإنو هو ما بعيبو شي مثل ما بقولوا السوريين أو ما بعيبو شي غير جيبتو مثل ما بقولوا المصريين بعكس البنت يلي حتى حقوقها بتعيبها ، فالشب لازم يقعد ويحضّر ليستا طويلة عريضة عن فتاة أحلامو وكأنو هو كامل مكمل خزيت العين أسامي الله تحمي ملك زمانو وبدو يتجوز أميرة الدهر .. يا بابا روح انستر مع شي وحدة خلوقة ومحترمة أحسن ما الله يبعتلك شي وحدة تكون أميرة جمال بس تعوفك سماك صبح ومسا ..

أما البنت فكمان صار عندها إحساس إنو هي لازم “أتشعر” العالم بوجودها بشتى الطرق الأخلاقية والغير أخلاقية المؤدبة والغير مؤدبة المهم أنو أتشعر يلي حوليها وأنا كتير بأشعر بدني من هيك فصول ، يعني بتنزل عالطريق وخاصة بالصيف .. نحنا هلأ الحمد لله بالشتي بس بالصيف يعني مدري كيف بتحمل حالي من كثر الإغراءات يلي بشوفها وين ما راحت وين ما إجيت .. يعني يلي حابب قولوا إنو هالبنات ونتيجة إحساسهن إنو ما لازم يفوتهم قطار الجواز فلازم يلفتو نظر الشباب بأي طريقة ممكنة لعلهم “يصطادون عريساً” يكمل معهم الحياة ، ومن شان هيك بتلاقيهم مثلاً لابسين “مشروع أواعي” كلمة مشروع تعني فكرة مصغرة وبالتالي معنى العبارة السابقة أنن لابسين عينة مصغرة من البنطلونات تسمى تنورة فوق الركبة ، “مشروع كنزة” ولها معاني كثيرة : بلوزة شفافة ضيقة ، كنزة قصيرة فوق الصرة ، كنزة حفر مفتوحة الصدر ، وشغلات غريبة عجيبة ..

طيب يا جماعة حتى ما طول السيرة كثير أنا عندي حل : ليش كمان ما البنت تروح تخطب هي ؟؟ يا خيي تدور على شي شب وتشوفو وإذا عجبها يروح أبو البنت لعند أبو الشب ويقدم بنتو وعلى سنة الله ورسوله ، يعني مو هيك أحفظ لكرامة المرة وأخلاقها وعفتها وبنفس الوقت أحسن للشب بأنو يا خيي كمل نصف دينو بدون ما يكون ضوع النصف الأولاني وهو عم يلحق هالإغراءات ، الموضوع ببساطة هو هيك ، وشوي من عند أهل الشب وشوي من عند أهل البنت وخلوا هالعالم ينسترو بقا ، يعني مو ضروري يقعد أبو البنت يتشرط شروطو التعجيزية عالشب يلي هو بعدو بأول طلعتو ويا دوب عم يشتغل منيح والحال مستورة ، طبعاً أنا بقول أنو الأب لازم يحفظ مستقبل بنتو بس يا عمي زمانكن غير زمانا .. بزمانكن كنتوا مرتاحين والأوضاع المعيشية أسهل مو متل هلأ نسب البطالة متفشية وما في شغل .. ويا عم إذا ما اقتنعت بهالتبرير شغل هالشب عندك بالمحل أو المصنع أو الورشة لأني متأكد إنك أنت بذاتك ما عندك أماكن شاغرة ومتخم من كثر الشغيلة..

موضوع خطبة البنت ما هو موضوع جديد مثلأ أو سابقة تاريخية جبتها من سكان كوكب زحل ، خلونا نرجع للتاريخ ولزمن البني الأكرم (ص) ، مو السيدة خديجة رضي الله عنها هي يلي ائتمنت البني عليه الصلاة والسلام على أموالها بالشغل ووقت وجدت أنه الصادق الأمين أرسلت إليه من يذكر محاسنها عنده فأعجب بها وذهب وخطبها وتزوجها ولولا السيدة خديجة ومالها لما قام للإسلام قائمة ، حبيت حط هي القصة للمشككين بأنو الدين بيرفض خطبة البنت ..

هلأ الموضوع بطول كثير وبعدني ما حكيت عن “غرور” الشب إذا البنت خطبتو .. بس برأيي يعني ما ينفخ حالو كثير أحسن ما يطق .. والشغلة الثانية إنو يمكن هذا الحل يكون صعب بالحالة المصرية ومن شان هيك في حل ثاني وهو تعدد الزوجات ، صحيح أنو حل حتى أنا كشب ما كثير بحبو فكيف بالنسبة للبنت .. بس برضو هو حل قائم ومشروع ..

وبالأخير بقول لهلي عندو أي تسائل : لا يا قلبي “أنا مش عايز أتجوز هلأ .. برضو مرتاح بالوضع كده” :)