جرى الحوار الآتي بيني وبين صديق لي يعمل في الصحافة ، أحببته أن أنقله لكم لأهمية الموضوع وحساسيته ..

الصحفي : شفتلي هاد الرابط .. ادخل وعلق وأعطي رأيك بالموضوع .. لأنو شكلو الكل لازم يعلق ..
( لم و لن يكون التدوين السوري بوابة التطبيع مع الصهاينة )

مستر بلوند : برأيك لازم علقّ إيجاباً ولا سلباً .. لأنو أنا رأيي مختلف ..
أنا مع الإعلام والإعلام المضاد ، وإسرائيل من يوم يومها متفوقة علينا إعلامياً وتضمن الرأي العام العالمي لصالحها .. يعني نحنا ما لنا حق كمان ندافع عن أنفسنا إعلامياً ونحكي كلمتنا ونعبر عن موقفنا ..

الصحفي : يعني كلمتنا فيها تكون بدون حوار مع اسرائيل .. يعني فينا نحكيها ونوزعها وننشرها ..
بس مو هاد المهم .. المهم أنت بتأيد الحوار مع اسرائيل ؟؟ هاد أول سؤال ..
السؤال التاني أنت مشارك بهاد الحوار اصلاً ؟؟

يعني البيان عم يطلب من الكل إما ينفو المشاركة أو يقولوا أنهم ضد الحوار .. لأنو الطرف الأخر عم يقول إنو المدونين السوريين موافقين على الحوار مع اسرائيل .. وإنو في منن مشاركين أصلاً بهاد الحوار ..
وبالتالي مطلوب من الناس موقف معلن ..

مستر بلوند : لا هيك عم تتهمني صرت .. طول بالك مو بالهدرجة ..
كيف بدي كون مع الحوار أو مشارك فيه وأنا أساساً توجهاتي مقاومة من يوم يومها ..
بس الفكرة تبعي وهي نفس فكرة صاحب الموقع .. إنو اسرائيل لها إعلام وتكسب الرأي العالمي لصالحها دوماً .. طيب نحنا كمان كسوريين بما إنو في موقع عم يحاول يجمع وجهات النظر لازم نحط رأينا ولازم نستخدم إعلامنا وأقلامنا .. هي فكرتي الرئيسية .. الحوار هو ليس لأجل التطبيع كما يقال .. الحوار هو الرأي والرأي المعاكس ..
اسرائيل عم تحكي عن حقوقها بالدفاع عن نفسها .. نحنا لازم نحكي عن حقوقنا بالأرضي المغتصبة ..
هلأ أكيد هيدا الموقع بالنهاية وحرص الإسرائيليين عليه هو من أجل التطبيع أو ليقولوا هي السوريين عم يحكوا معنا .. بس إنو هو فرصة كمان لنحكي للعالم موقفنا من هيدا الصراع .. ويبقى هذا رأيي ..

الصحفي : طبعاً أنا رأيي مو هيك منوب ، يعني بكفي تسأل ليش حزب الله بيرفض الحوار مع اسرائيل ..
الحوار بيكون بين أطراف مو واضحة أفكارهم لبعض، أو آخدين فكرة مختلفة عن بعض وبيجي الحوار لحتى يوضح الصورة للاثنين .. بس وقت بيكون في حدا آخد حقك .. وبيجي بيقلك لازم نتحاور مشان نتفاهم على هاد الحق .. هاد بصفي اسمو علاك ..
أنت شو هدفك من الحوار .. إنك تفهّم الاسرائيليين إنهم لصوص وإنك أنت على حق؟؟ هاد ما بدو حوار .. لأنو الحرامي ما بدو مين يقلو إنك حرامي ..

بس وجهة نظرك صحيحة إنو لازم نقوي حالنا إعلامياً .. بس بهي الحالة لازم نحاور اللي آخد عنا فكرة غلط .. يعني أوربا .. أميركا .. استراليا .. أو الامم المتحدة .. هيك ممكن إفهم ليش الحوار ..
بس بعمرك شفت حوار بين الجاني والضحية ؟؟ يمكن للضحية أو للجاني إنو يتحاوروا مع القاضي أو مع الحكم .. بس ما بيصير حوار بين الضحية والجاني ..

ما كان بدي ناقش بالفكرة لأنو مو هي موضوع نقاشنا .. موضوع نقاشنا هو البيان .. وتعليقك ع البيان لا يعني أنك تؤيد أو ترفض فكرة الحوار .. البيان عم يقول إنو ما في حوار معلن أو تطبيع بين المدونين السوريين وبين الاسرائيليين ..
وهاد برأي هام جداً .. لأنو موقع الحوار سوّق إنو المدونين عم يحاوروا بعضهم .. وهاد شي كاذب ، والمطلوب حالياً التعقيب على البيان بهاد الموضوع وبهي النقطة .. إنو هل برأيك المدونون السوريون عم يحاوروا اسرائيل ؟؟
لأنو في حدا حكى باسم المدونين السوريين .. وطالما ضلت أسماء المدونين العشرة مغفلة فهاد يعني كل المدونين متهمين حتى يتبرؤوا من هي القصة ..
يا زلمة إذا يزن بدران وأنس قطيش اللي كان اسمهم على الموقع طلعوا بيان وانكروا فيه الحوار .. فما بالك باللي مو أسمائهم هنيك .. يعني كتير عادي يقولوا نحنا لسنا معنيين بهذا الموضوع ..

مستر بلوند : إيوا فهمت عليك شو بدك بالضبط ..
ورأيك عجبني .. صحيح الحوار ما بصير بين الجاني والضحية ..
وهيدا الموقع مثل ما قلتلك ما بتوقع يكون سوى واجهة تطبيع أكثر من إنو يكون هدفه الحوار ..
على كل رح اكتب تعليقي على بيان المدون .. وخاطر عبالي اكتب تدوينة بهيدا الخصوص ومضمونها هو رسائلنا هي .. لأنو الموضوع جداً حساس وخطير بحسب ما عم تحكي ..